CLIDIUM

CLIDIUM

apud Plinium, l. 9. c. 15. Thynni, membratim caesi, cervice et abdomine commendantur atque clidio, recenti duntaxat: Festo, ex Naevio, petimen piscinum, quod est inter duos armos ad pectus: Iugulus aliis. Claviculas Medici vocant, hinc Athen. l. 6. orcynos Gadibus pinguissimos esse tradens, propterea seorsum clidia illorum sale condiri, ut antacaeorum palatum et maxillas, ex iisdemque parari melandrya, ait. Idem paulo ante laudatas fuisse thynnorum κλεῖδας, testatur, citatô Atistophane. Ad pisces vox translata ab homine, in cuius corpore quid κλεῖδες sint, ex Rufo et Polluce notum. A cuius partis similitudine τὰς κλεῖς dictas esse idem ait, quae σιδρρᾶ μοχλία, ferreos obices, alii appellent. Nempe vocem κλεῖς, claustrum notare, seu id quod ianuam claudit potius, quam clavem, supra diximus. Unde κλειδία et κλεῖθρα, claustra, e ferro duplici compacta et quadrata, cum ferreis intus veruculis seu pessulis, qui modo adducerentur et reducerentur, modo succuterentur, de quibus aliquid diximus retro in voce Assarium, item in Claustra. Vide Dalechampium, Not. ad Plin. et Salmas. ad Solin. p. 934.